【星級專欄 : 何里玉】柏烏小姐的人生就是喪loop
上星期四上映既《柏鳥小姐的童幻世界》叫好叫座,我何里玉就要去睇吓齣戲有幾堅。對於奇幻電影一向都唔想抱太大期望,事關奇幻電影既創意同新鮮感一定要做得好足,否則好難滿足到我何里玉同而家既戲迷。整齣戲歷時兩小時,頭30分鐘略嫌節奏太慢喇,坐隔離位先生已經瞓著咗,但係呢三十分鐘都算係關鍵時刻,一不留心有可能導致你下半場戲唔知發生咩事,故事概念有啲似經典美國科幻電影《回到未來》x 《哈利波特》x 《變種特攻》既crossover版,因為佢有《回到未來》既穿越時空但係就以《哈利波特》既方式去進行,而電影裡面既異能人士招式強勁拍得著《變種特攻》。 睇得鬼才導師添布頓既戲,總會對人物角色造型上有啲期望既,今次最突出既係用頭髮收埋個大口喺後腦既女孩同埋包到實見唔到樣既孖生寶寶,其次就係靚女主角柏鳥小姐(Eva Green飾演)及輕到隨時飄走既愛瑪布倫(Ella Purnell飾演),仲有可怕的「空魔」。 故事主要講述柏鳥小姐為咗保護一班天生有異能的孤兒,每一日就做控制著時間「時鳥」,不停喪loop同一日,令一班孤兒永遠都唔會長大變老,安穩過度每一日。其實打工仔咪又係每日喪loop同一樣既工作,安穩度過每一日。 我何里玉睇完呢齣戲就話你知,咁逃避落去都唔係辦法,面對現實把啦!
何里玉
【星級專欄:何里玉】《29+1》笑中有淚.眼淚滴到落心口
眼淚並唔係因為30歲女人嫁唔出有幾慘,而係呢套本來對於我何里玉沒有太大期望既戲卻令人有意想不到既感覺。玉姐我入場前只係覺得個戲名《29+1》幾得意,講兩個同年同月同日生而喺唔同環境長大既女人,即將踏入30歲關口而面對既壓力,由集編、導、演、教於一身既彭秀慧將舞台劇搬咗入電影。 頭Part對鏡頭講感受果段戲好有小男人週記feel,亦刻意將舞台劇既感覺拉噃入套戲,事關《29+1》首個舞台劇演出係喺2005年,由今次編劇兼導演彭秀慧一人分飾兩角既個人劇場作品,反應好到之後8年內多次重覆上演,累積咗91場演出, 算係本地最受歡迎的女生獨腳戲,今次重新拍成電影將《29+1》搬入戲院。一個故事演咗咁多年並唔簡單,又或者係中女威力唔簡單。 講噃轉頭,《29+1》以倒敍式開波帶到主角娜姐(演林若君)既中女生活,面對感情、工作、生活轉變既壓力,成班女人一齊敷mask既畫面好正,到遇上樂天欣宜(演黃天樂)既強烈對比,令入場睇既觀眾會有好多諗法。催淚位出乎意料多 – 愛情、親情、友情、老闆同員工既人情味,特別係同爸爸果段戲,玉姐我喊點極低已經哭崩長城,眼淚由面珠流到嘴唇滴埋落心口,仲有聽到好多同場觀眾拆紙巾袋同嗦鼻涕既聲。唔洗驚,套戲並唔係齋喊咁慘既仲有好多令你笑既片段由鄭欣宜、BabyJohn 蔡瀚億、楊尚斌、林海峰送俾你。P.S 娜姐演戲進步咗&入場睇唔一定要係中女
何里玉
【星級專欄 : 何里玉】等足12年.BJ 中女變搶手媽
當知道《BJ單身日記:生得啦BABY》會喺今年上映既時候就已經非常期待Bridget Jones(Renée Zellweger飾演)的演出,事關我何里玉一直都係BJ既fans, 由2001年上映的《BJ單身日記》到2004年續集《BJ單身日記:愛你不愛你》,等足十二年終於有第三集睇。 開場無幾耐主角BJ就出場,嗱今次Renée Zellweger無再為部戲增肥,亦都冇著亞婆底褲,當第一眼見到BJ實在有點嚇親同埋覺得心寒,令我何里玉又意識到一個女人相隔十二年既變化真係唔簡單,喺我腦海裡肥嘟嘟既可愛BJ,變成一個消瘦滄桑既女人,對比以前既BJ的確老了不少,畢竟與第一集BJ上映到現在都相隔咗15年既時間,而Renée Zellweger的確已經47歲喇!雖然佢啲春風滿面既表情係有啲難頂既,但整體上並無影響到BJ既演技,無令觀眾失望,就好似BJ從來無變既性格,保持一貫傻吓傻吓同埋癲癲哋既態度,開始既時候係有啲悶既,但係越睇越好笑。 BJ喺第三集同樣單身,唔同既就係佢變咗位事業型女士。 《BJ單身日記:生得啦BABY》除咗必有既愛情故事之外,今次仲多咗腹中塊肉,玩埋中女有喜!由首集《BJ單身日記》開始就陪著BJ既智慧型暖男律師Mark (Colin Firth飾演),繼續都係BJ既情意結。如果你同我何里玉一樣都掛住靚仔Hugh Grant既話就會有啲失望喇,有睇電影海報都知,今次佢真身係唔會出現喺戲中,但係佢既精神同在。 話說回來,BJ第一、二集故事總是圍繞二揀一,今集都唔例外,除咗Mark之外,今次殺出另一暖男又風趣又細心兼有錢既億萬富豪Jack (Patrick Dempsey飾演),簡直係9成女人既Dream Man,表面睇Jack勝算極高,要我何里玉揀既話就一定揀亞Jack喇!不過今次除咗揀條件之外,仲要睇埋天意喇~ 因為誰是BB爸爸,唔到最後都唔知! P.S.飾演醫生既Emma Thompson為笑位出力加分
何里玉
【星級專欄 : 何里玉】戲迷喪插《驚心破》.何里玉抱不平
由劉青雲及謝霆鋒領導主演既電影《驚心破》,喺香港上映幾日就被大批戲迷喪插,我何里玉當然要去了解吓啦,事關我里玉姐係青雲既支持者,佢演既戲我唔覺得會好差,確實戲迷大鬧既唔係主角既演技,而係戲中既特技效果同埋個故事,話特技效果假到爆加埋好多野冇解釋等等。無可否認套戲既特技效果係爭啲既,特別係開場冇耐喺汀九橋「將軍」飛走果場戲,可能香港人睇得MARVEL多要求高咗,所以大家都接受唔到。 講蕃我何里玉點解要抱不平先,除咗支持青雲之外呢,其實都支持電影製作既所有工作人員,每一位都要付出好多心機與時間,冇人會想部戲衰既。兩位影帝青雲與霆鋒演技好就唔需要質疑,繼2012年《消失的子彈》後再度合作,默契好到動作位可以一TAKE過,而青雲演過有關精神心理異常角式既電影都唔係第一次,例如係2007年《神探》飾演一個可以睇到人內心陰暗面既天才警探陳桂彬、2015《暴瘋語》中飾演高智商又有嚴重暴力傾向的心理疾病患者范國生,到今次《驚心破》就飾演犯罪心理學教授車家偉,呢啲角式唔百分百投入又點會演得咁好。 故事有啲位都幾有趣既,例如將別人既器官換咗比自己,連性格或口味都有機會變得同捐贈者一樣。電影又特別引用咗德國哲學家、思想家Friedrich Wilhelm Nietzsche既作品《善惡的彼岸》中既兩句格言:「與怪物戰鬥的人,應當小心自己不要成為怪物。當你遠遠凝視深淵時,深淵也在凝視你。」 究竟呢兩句點解 ? 同埋套戲講乜 ? 唔好聽人講喇,自己去睇吓啦,唉!
何里玉
【星級專欄 : 何里玉】永遠懷念「喪屍」!
「嘩!新年流流睇啲咁既戲呀?」 可能大部份觀眾都會想喺新年睇喜劇,我何里玉都同意既,可惜今年可以選擇既喜劇唔多,自己search吓啦。如果你同我玉姐一樣都係《生化危機》系列既粉絲就無理由唔睇《生化危機:終極屍殺》,你都應該知道今次係最後一集喇,由2002年開始嚟到今年2017年第六集,亦都係最終章,經歷十五年同《生化危機》建立既感情,突然要完結真係有啲唔捨得。雖然《生化危機:終極屍殺》已經係第六集, 我何里玉仍然覺得好正,女主角依然係打不死既神奇女俠,一千幾百萬隻喪屍、喪屍狗、怪獸、激光通道、捕獸器、跳樓、斷指等上刀山落油鑊既N個難關都死唔去,勁!電影世界就係有無限既幻想空間。想有窒息感覺既戲迷一定要入場睇,事關由開場到尾我玉姐一直緊握拳頭手心出汗連爆谷都唔記得擺入口,刺激到我好似親身落場打埋一份咁,緊張到抖唔到氣,一個字 「累」。除咗打打殺殺指定動作之外,緊張過程中都係有一貫作風加入少少感情位,複製人係有啲Sad既,但一向喊點極低既何里玉都感動唔到,唔緊要賣點並唔係催淚。去到最後,好多戲迷都覺得電影留有伏線,講到好似會有續集咁,連我玉姐都有呢個諗法,究竟《生化危機:終極屍殺》係咪真係終極呢 ? 唔好講廢話喇,支持《生化危機》系列、支持喪屍、支持女主角Milla Jovovich 既戲迷去睇吧!
何里玉