【星級專欄 : 何里玉】永遠懷念「喪屍」!
「嘩!新年流流睇啲咁既戲呀?」 可能大部份觀眾都會想喺新年睇喜劇,我何里玉都同意既,可惜今年可以選擇既喜劇唔多,自己search吓啦。如果你同我玉姐一樣都係《生化危機》系列既粉絲就無理由唔睇《生化危機:終極屍殺》,你都應該知道今次係最後一集喇,由2002年開始嚟到今年2017年第六集,亦都係最終章,經歷十五年同《生化危機》建立既感情,突然要完結真係有啲唔捨得。雖然《生化危機:終極屍殺》已經係第六集, 我何里玉仍然覺得好正,女主角依然係打不死既神奇女俠,一千幾百萬隻喪屍、喪屍狗、怪獸、激光通道、捕獸器、跳樓、斷指等上刀山落油鑊既N個難關都死唔去,勁!電影世界就係有無限既幻想空間。想有窒息感覺既戲迷一定要入場睇,事關由開場到尾我玉姐一直緊握拳頭手心出汗連爆谷都唔記得擺入口,刺激到我好似親身落場打埋一份咁,緊張到抖唔到氣,一個字 「累」。除咗打打殺殺指定動作之外,緊張過程中都係有一貫作風加入少少感情位,複製人係有啲Sad既,但一向喊點極低既何里玉都感動唔到,唔緊要賣點並唔係催淚。去到最後,好多戲迷都覺得電影留有伏線,講到好似會有續集咁,連我玉姐都有呢個諗法,究竟《生化危機:終極屍殺》係咪真係終極呢 ? 唔好講廢話喇,支持《生化危機》系列、支持喪屍、支持女主角Milla Jovovich 既戲迷去睇吧!
何里玉
【星級專欄 : 何里玉】柏烏小姐的人生就是喪loop
上星期四上映既《柏鳥小姐的童幻世界》叫好叫座,我何里玉就要去睇吓齣戲有幾堅。對於奇幻電影一向都唔想抱太大期望,事關奇幻電影既創意同新鮮感一定要做得好足,否則好難滿足到我何里玉同而家既戲迷。整齣戲歷時兩小時,頭30分鐘略嫌節奏太慢喇,坐隔離位先生已經瞓著咗,但係呢三十分鐘都算係關鍵時刻,一不留心有可能導致你下半場戲唔知發生咩事,故事概念有啲似經典美國科幻電影《回到未來》x 《哈利波特》x 《變種特攻》既crossover版,因為佢有《回到未來》既穿越時空但係就以《哈利波特》既方式去進行,而電影裡面既異能人士招式強勁拍得著《變種特攻》。 睇得鬼才導師添布頓既戲,總會對人物角色造型上有啲期望既,今次最突出既係用頭髮收埋個大口喺後腦既女孩同埋包到實見唔到樣既孖生寶寶,其次就係靚女主角柏鳥小姐(Eva Green飾演)及輕到隨時飄走既愛瑪布倫(Ella Purnell飾演),仲有可怕的「空魔」。 故事主要講述柏鳥小姐為咗保護一班天生有異能的孤兒,每一日就做控制著時間「時鳥」,不停喪loop同一日,令一班孤兒永遠都唔會長大變老,安穩過度每一日。其實打工仔咪又係每日喪loop同一樣既工作,安穩度過每一日。 我何里玉睇完呢齣戲就話你知,咁逃避落去都唔係辦法,面對現實把啦!
何里玉
【星級專欄 : 何里玉】超強女黑人!天賦.堅毅 改寫命運
被「美國全國電影評論學會」挑選為「年度十大最佳影片」既《NASA無名英雌》(Hidden Figures)昨日於香港正式上映,個個睇完都讚好,我何里玉又點會錯過咁好既電影。足兩小時的電影,眨吓眼就過去,玉姐我睇完呢套戲好振奮好激動,內心團火要爆喇!雖然以真人真事改編歧視黑人及性別為題既電影並唔係新鮮事,但係呢套戲除咗講被歧視有幾辛酸及不公平之外,裡面仲有好多人生哲理同現實生活好有關係,戲中鋪排的細節一句一句打入人心。三位數學天才的女黑人,各有家庭亦奮力投入NASA(美國太空總署)既精密計算工作,即使受盡冷眼、歧視、屈辱、不尊重,一盆盆冷水倒落嚟,都仍然保持自己專業態度,堅持目標掙扎求存。三位天才黑人女數學家將世界覺得無可能的夢想切切實實地展現眼前,「凡事總有第一人做到」!我玉姐睇見佢地不斷自我增值用盡全力去爭取自己既目標,睇到又嬲又激動又感動,感觸湧晒出嚟,香港人唔好成日怨天尤人,喺失敗同放棄既時候先問吓自己究竟有冇盡過力? 有時輸就係輸喺自己度,自視過高、心胸狹窄、目光短淺的人注定失敗!成功非僥倖,堅持努力先有成果,呢個世界上「無名英雌」又點只佢地三位。 P.S. 《NASA無名英雌》何里玉本年度推介必睇之選!
何里玉
台灣青春第三部曲《六弄咖啡館》
上星期忙都癲,終於喺Happy Friday同朋友食完晚飯後擠啲時間睇齣戲,午夜場次喺《C奶同學會》或《六弄咖啡館》裡二揀一,兩齣戲影評分數差唔多,唔知揀邊齣好,所以就隨便揀咗早五分鐘開場兼入場人數較多既《六弄咖啡館》,喺完全唔知故事大綱同冇睇過trailer既情況下就衝咗入戲院睇喇! 老實講我何里玉對呢齣戲都有少少期望既,事關見到張電影poster寫著「《那些年,我們一起追的女孩》《我的少女時代》後,最有共鳴的台灣青春第三部曲《六弄咖啡館》」呢句幾有牙力喎 !(似乎太天真了-_-") 如果你都有睇過 《那》《我》兩齣戲,你會知道笑位有幾好笑,催淚位有幾催淚!用《那》《我》兩齣戲作招徠其實有點捉蟲,因為《那》《我》都算係頭啖湯,喺觀眾心目中經已留下深刻印象,至少我何里玉仍然記得睇兩呢兩齣戲後就喊到變豬頭 (補充:何里玉感情極度豐富,喊點極低),加上首部曲《那》片喺2012年成為香港華語電影史上最賣座的電影,喺香港上映短短四週票房超過六千萬,二部曲《我》片亦喺2015年香港上映五週票房超過四千萬。 正所謂有期望先會有失望! 大家又唔好誤會喎,只係首兩部曲氣勢太強,《六弄咖啡館》亦係稱得上合格有多既,故事內容與《那》《我》一樣都係圍繞中學生時代既愛情故事及長大後既發展,又係乖乖女愛上壞男生,追女同打架場面,有攪笑有感人,畢業後各散東西等等;戲名叫得《六弄咖啡館》,當然唔少得咖啡館既事,開場由咖啡店老闆(戴立忍飾演) 同一個剛跟男友鬧交既梁小姐(張榕容飾演)講一段1996年夏天發生的故事,最後都係出現咖啡店老闆同梁小姐埋尾,當然有意思啦(但呢個開場同結尾感覺有啲老土) ~ 講噃戲裡除咗有乖女生李心蕊(顏卓靈飾演) 同壞男孩關閔綠(董子健飾演)主角之外,一定會有一個醜女死黨蔡心怡(歐陽妮妮飾演)及攪笑男死黨蕭柏智(林柏宏飾演)撐場,兩肋插刀既兄弟誓要追到心怡既女仔而發展成喜劇中的悲劇,將人生中的精彩和遺憾連埋一齊。 又講吓睇靚仔靚女喇~三部曲之中的男女主角《那》柯震東及陳妍希;《我》王大陸及宋芸樺;《六》董子健及顏卓靈,個人喜好都係覺得《那》中主角柯震東及陳妍希啱心水啲,但《六弄咖啡館》既死黨角色蕭柏智都幾出位既;另外完場唔好即刻走呀,仲有野睇!講住咁多先,最後一句 「始終係三部曲,貫徹始終 ~ 一個出人意表的結局」。
何里玉
【星級專欄 : 何里玉】等足12年.BJ 中女變搶手媽
當知道《BJ單身日記:生得啦BABY》會喺今年上映既時候就已經非常期待Bridget Jones(Renée Zellweger飾演)的演出,事關我何里玉一直都係BJ既fans, 由2001年上映的《BJ單身日記》到2004年續集《BJ單身日記:愛你不愛你》,等足十二年終於有第三集睇。 開場無幾耐主角BJ就出場,嗱今次Renée Zellweger無再為部戲增肥,亦都冇著亞婆底褲,當第一眼見到BJ實在有點嚇親同埋覺得心寒,令我何里玉又意識到一個女人相隔十二年既變化真係唔簡單,喺我腦海裡肥嘟嘟既可愛BJ,變成一個消瘦滄桑既女人,對比以前既BJ的確老了不少,畢竟與第一集BJ上映到現在都相隔咗15年既時間,而Renée Zellweger的確已經47歲喇!雖然佢啲春風滿面既表情係有啲難頂既,但整體上並無影響到BJ既演技,無令觀眾失望,就好似BJ從來無變既性格,保持一貫傻吓傻吓同埋癲癲哋既態度,開始既時候係有啲悶既,但係越睇越好笑。 BJ喺第三集同樣單身,唔同既就係佢變咗位事業型女士。 《BJ單身日記:生得啦BABY》除咗必有既愛情故事之外,今次仲多咗腹中塊肉,玩埋中女有喜!由首集《BJ單身日記》開始就陪著BJ既智慧型暖男律師Mark (Colin Firth飾演),繼續都係BJ既情意結。如果你同我何里玉一樣都掛住靚仔Hugh Grant既話就會有啲失望喇,有睇電影海報都知,今次佢真身係唔會出現喺戲中,但係佢既精神同在。 話說回來,BJ第一、二集故事總是圍繞二揀一,今集都唔例外,除咗Mark之外,今次殺出另一暖男又風趣又細心兼有錢既億萬富豪Jack (Patrick Dempsey飾演),簡直係9成女人既Dream Man,表面睇Jack勝算極高,要我何里玉揀既話就一定揀亞Jack喇!不過今次除咗揀條件之外,仲要睇埋天意喇~ 因為誰是BB爸爸,唔到最後都唔知! P.S.飾演醫生既Emma Thompson為笑位出力加分
何里玉